“Бася и Піглас”: хто ён такі - сучасны беларускі мумі-троль?

Хутка Каляды i Новы год! Час, калі спраўджваюцца мары. Час, калі ўсе (і асабліва дзеці) чакаюць цудаў. А тыя абавязкова зазіраюць да кожнага, хто ў іх верыць. Гэта адчуванне шчырасці і натхнення, свята і загадкі, палёту і, вядома, - казкі.

А хто ён такі - герой сучаснай навагодняй казкі? Кніга “Бася і Піглас” адказвае на гэтае пытанне. Пэўна, вы ўжо ведаеце напалову птушку, напалову вока. І сапраўды, Піглас - даволі вядомая істота. Яе можна пабачыць на буцінанках маладой беларускай мастачкі Надзі Букі. Незвычайны персанаж, які жывіцца драўлянымі прышчэпкамі і размаўляе бурбалкамі, - неад’ёмная частка большасці карцін аўтара. Вам выпадае магчымасць пазнаёміцца з ім бліжэй.

У кнізе “Бася і Піглас” Надзя Бука вырашыла апісаць гісторыю нараджэння казачнай істоты. Гэта кніга пра добрыя учынкі і сямейныя каштоўнасці, пра натхненне і бязмежныя дзіцячыя фантазіі. Адметна тое, што Надзя Бука - аўтар таксама і ілюстрацый. Такім чынам, мастачка працягвае традыцыі найцікавейшых замежных пісьменнікаў  - Антуана дэ Сэнта Экзюперы і Туве Янсан. Першы аздабляў сваімі малюнкамі кнігу “Маленькі прынц”. Другая -  не толькі зрабіла мумі-троляў сусветна-вядомымі дзякуючы казцы, але і намалявала іх.